Surah An-Nas inatahadharisha kuhusu majaribu maovu
Sura An-Nas ya Qur'ani Tukufu inatuonya tuwe macho dhidi ya watu kama hao.
An-Nas ni Sura ya 114 na ya mwisho ya Qur'ani Tukufu ambayo ina aya 6 na iko katika Juzuu ya 30. Ni Makki na ni Sura ya 21 iliyoteremshwa kwa Mtukufu Mtume Muhammad (SAW).
Jina la sura ni An-Nas, likimaanisha watu na wanadamu, kwa sababu neno An-Nas limetajwa mara tano katika Sura.
Kwa kusoma sura hii, mtu hutafuta kimbilio kwa Mwenyezi Mungu kutokana na majaribu ya Shetani. Mwenyezi Mungu anamwamrisha Mtume Wake (SAW) kutafuta ulinzi kutoka Kwake dhidi ya vishawishi viovu.
Wafasiri wa Qur'ani wanaamini kwamba Nas ya kwanza iliyotajwa katika Sura hii inawahusu watu kwa ujumla, na ya pili inawahusu wale wanaoshambuliwa na vishawishi vya majini na watu, na ya tatu inawahusu wale wanaowajaribu wengine.(Aya ya 5).
Mtu anapokabiliwa na uovu ambao hawezi kukabiliana nao, angekimbilia kwa mtu mwenye nguvu. Mwenyezi Mungu ndiye kimbilio bora zaidi kwani Yeye ndiye anayetimiza mahitaji ya wanadamu. Ana nguvu. Yeye ndiye anayepaswa kuabudiwa. Naye ndiye Mfalme wa dunia na viumbe vyote.
Kwa hiyo, mtu anapopatwa na tatizo au taabu maishani, anapaswa kukimbilia kwa Mwenyezi Mungu na kumwomba msaada.
Katika Surah An-Nas, Shetani anaelezewa kama Waswas al-Khannas (mshawishi muovu mwenye kunyemelea). Wafasiri wa Quran wanasema kwamba Shetani huwa ananong'oneza majaribu katika nyoyo za watu isipokuwa nyakati wanazomkumbuka Mwenyezi Mungu. Wanapomkumbuka Mungu, Shetani hurudi nyuma na mara tu wanapomsahau Mungu, yeye huja mbele na kuanza tena majaribu yake.
Sura hii pia inazungumzia makundi yanayoingiza majaribu katika nyoyo za wanadamu, na makundi haya yanaweza kuwa watu au majini (Aya ya 6). Kwa hiyo kwa mujibu wa aya hii, baadhi ya watu wamepotoka kiasi kwamba wana uwezo wa kuwapoteza wengine pia na wao ni hatari kama Shetani.
