یونېسف: د ناچاوده ماینونو ۸۵ سلنه قربانیان افغان ماشومان دي
ایکنا د پارس ټوډې په حواله خبر ورکوي چې، افغانستان یو له هغو هیوادونو څخه دی چې د څو لسیزو له جګړو پاتې مرمۍ او ماینونه وخت په وخت پر ملکي وګړو چوي او مرګ ژوبلې اړوي.
د یونسیف په وینا، افغانستان د جنګي وسلو او مهماتو تر ټولو ککړ هېواد دی.
دې ادارې ویلي، چې له اروپايي ټولنې سره یوځای افغان ماشومانو ته ښيي چې ناچاودلي مهمات وپېژني او ځان ورڅخه وساتي.
د سره صلیب د نړیوالې کمېټې پر اساس، د ۲۰۲۲ له جنورۍ څخه د سږ کال تر جون پورې په افغانستان کې له جګړو څخه د پاتې ناچاودلو مرمیو او ماینونو په چاودنو کې ۶۴۰ ماشومان وژل شوي یا ټپیان شوي دي.
سورصلیب وايي، چې له جګړې پاتې مهمات په افغانستان کې د ملکیانو لپاره یو خورا لوی او دایمي خطر دی، خو د چاودېدونکو توکو او ماینونو د پاکولو لپاره هلې ځلې تراوسه بریالۍ شوي نه دي.
دې کمېټې همداراز ویلي، سره له دې چې اوس په افغانستان کې جګړه کمه شوې، د ۲۰۲۱ له اګست را په دې خوا د ماینونو او نورو ناچاودو مهماتو د چاودنو په اثر مرګ ژوبلې نه یوازې کمې شوي نه دي، بلکې لا زیاتې شوي دي.
