İƏT Baş katibinin müavini: İşğaldan azad edilmiş ərazilərdə gördüyümüz mənzərə çox ürəkağrıdıcıdır

“İndiyə kimi gördüyümüz mənzərə çox ürəkağrıdıcıdır. Təəssüf hissi ilə qeyd etmək istəyirəm ki, bizimlə eyni bəşəriyyəti bölüşən insan məxluqları belə vəhşiliklər törədiblər”.

“İndiyə kimi gördüyümüz mənzərə çox ürəkağrıdıcıdır. Təəssüf hissi ilə qeyd etmək istəyirəm ki, bizimlə eyni bəşəriyyəti bölüşən insan məxluqları belə vəhşiliklər törədiblər”. - bunu İslam Əməkdaşlıq Təşkilatının (İƏT) Baş katibinin İqtisadi məsələlər üzrə köməkçisi Əhməd Kavesa Senqendo Ağdama səfəri zamanı jurnalistlərə açıqlamasında deyib.

 

O bildirib ki, bu məsələdə İƏT-in mövqeyi əvvəldən bəllidir: “İƏT hər zaman Azərbaycanın torpaqlarını azad etmək hüququnu tanıyır və bunu ədalətli mövqe kimi qəbul edir. Öz qətnamələrində də bunu Azərbaycanın haqqı olaraq tanıyıb. İƏT-ə üzv olan ölkələr Azərbaycana hər zaman siyasi dəstək göstərib. İndi biz bu ərazilərin azad olduğunu görürük. Amma mən Allaha dua edirəm ki, burada həyatını itirmiş şəxslərə özünün cənnətini nəsib etsin. Eyni zamanda da İƏT-ə üzv olan dövlətləri də bu ərazilərin yenidən qurulmasına və bərpa işlərinə qatılmağa çağırıram. Ümidvaram ki, onlar dəstəyə davam edəcək. Allah bundan sonra da Azərbaycana sülh nəsib etsin”.

 

Baş katibin müavini əlavə edib ki, ərazidə kifayət qədər görüləsi işlər var: “Bu işlərdə hər zaman İƏT Azərbaycanın yanında olacaq”.

 

Qeyd edək ki, İslam Əməkdaşlıq Təşkilatının nümayəndə heyəti bu gün Ağdama gəlib və Cümə məscidində namaz qılıb.

 

Nümayəndə heyətinin üzvləri işğaldan azad olunmuş ərazilərdəki vəziyyət və Ermənistanın Azərbaycana qarşı təcavüzünün nəticələri ilə tanış olmaq üçün Azərbaycana gəliblər. /maide.az